Modding-ak eskaintzen dituen hobekuntza estetiko edo teknikoez gain, originaltasuna eta pazientzia lantzeko ariketa bat ere bada; etengabe trebetasunak eta ezaupideak eskuratzeko aukera ematen du, eta “zuk zeuk egin ezazu” filosofiaren adierazgarri da. Horregatik, MODPC TALDEAk hitzaldi/tailer gisa egingo diren hainbat jarduera antolatu ditu party-a egingo den egunetarako. Hainbat eta hainbat material eta teknika aztertuko dira, hutsetik hasita, nahi duten guztiek parte hartu ahal izan dezaten.
Modding-ari aplikaturiko elektronika
Atal honetan elektronikaren oinarrizko
kontzeptuak azalduko ditugu, hala nola korrontea, tentsioa, Ohm-en legea eta
abar. Gehien erabiltzen diren gailuak ere aztertuko ditugu: erresistentziak,
kondentsadoreak, led diodoak, kommutadoreak, erreleak eta zirkuitu integratuak.
Azkenik, hainbat zirkuitu diseinatuko ditugu; produktu komertzialek duten
akabera izango ez duten arren, pertsonalizazio-maila handiagoa eskainiko digute
eta, lehen aipatu dugun bezala, ezaupide gehiago eskuratzeko aukera emango
digute. Hauek izango dira horietako batzuk: haizagailuak kontrolatzeko fanbus-ak
eta rheobus-ak, disko gogorraren edo soinuaren jarduera erakusten duen vumeter-a,
eta ur-ponpak edo disko gogorrak piztea automatizatzeko errelea erabiltzea.
Horietako batzuetarako gomendagarria izango da —ez, ordea, ezinbestekoa— zirkuitu
inprimatuak egitea. Horiek sortzeko gehien erabiltzen diren metodoak ere ikusiko
ditugu.
Miniaturazko soldadura
Ondoren, soldagailua ia derrigorrezko
bihurtzen dela ikusirik, tresna horri atal bat eskainiko diogu. Behar dugun
oinarrizko materiala zein den azalduko dugu, material hori nola erabiltzen
den erakutsiko dugu eta, era berean, gure osasuna kaltetu gabe akabera ona
lortzeko zer neurri hartu behar ditugun ere ikusiko dugu. Soldadura txikiei
arreta berezia eskainiko diegu; esate baterako, zirkuitu integratuetako eta
SMD kapsulatzeetako soldadurei. Bide batez, azken horiek beste hauetarako
modtxipak instalatzeko garaian duten aplikazioa ere ikusiko dugu: PS”, GC,
Wii, 360ko flasheatzeak... Azkenik, kontsola bati eskua sartzeko jardunbide
egokien eskuliburu bat eskainiko dugu.
Dremel materiala
Beste alde batetik, Dremelek merkaturatzen
dituen eta modding-a egiteko erabil daitezkeen produktuen lagin bat jarriko
dugu ikusgai. Era guztietako materiala egongo da: erabilera anitzeko erreminta
ezagunak, gas-soldagailuak, sarjentak eta gainerako euskarriak, eta abar.
Eskura ditugun buruen ezaugarriak aztertuko ditugu, eta horiek nola erabili
behar diren azalduko dugu. Ez ditugu beste markak alde batera utziko, eta
marken arteko bateragarritasunak laburbiltzen saiatuko gara. Ebaki, higatu,
lixatu, leundu... Denetarik egin ahal izango da, hainbat materialen txatalak
eskainiko baititugu, nahi duenak erremintak proba ditzan. Lanean hasi aurretik
jarraitu beharreko segurtasun-neurriak ere azalduko ditugu.
Beira-zuntza
Azken urteotan material hau erabiliz
pieza berriak modelatu eta sortzeak geroz eta indar handiagoa duela ikusita,
nola erabiltzen den xehetasunez azalduko dugu. Osagai narritagarriak dituenez,
material honekin lan egiterakoan nahitaezkoa da eskularruak, maskara eta betaurrekoak
erabiltzea. Narritadura eta alergiak nola saihets daitezkeen azalduko dugu,
gehienetan zentzuzkoak diren oinarrizko jarraibideak betez (esate baterako,
ondo aireztatutako lekuetan lan egitea). Parte-hartzaileek modu aktiboan hartu
ahal izango dute parte tailerrean, lan egiteko materiala eramango baitugu,
material horren ezaugarriak hobeto ezagutu ahal izateko.
Overclocking-tailerra
Azkenik, parte-hartzaileei overclocking-ari
buruzko azalpen orokorra emango zaie; jarduera horren oinarrizko ezaugarriak
azalduko dira bertan eta, horrez gain, benching saio bat egingo
da (hots, probak). Aire edo ur bidezko ohiko hozte-sistemez gain, hizlariek
izotz lehorra eta hainbat pot eramango dituzte, beren ekipoei ahalik eta etekin
handiena atera ahal izateko. Nahi dutenak gune horretara hurbildu ahal izango
dira hizlariak zertan ari diren ikustera, eta beren ekipoak ere ekarri ahal
izango dituzte, mundu liluragarri honetan lehen urratsak egiteko.
Zuen pot-ekin etortzera gonbidatzen zaituztegu, eta muturreko overclock-eko
saio irekietan parte hartzera.
Zalantzak edo iritziak azaldu nahi izanez gero, hizlariak helbide honetako foroetan aurkituko dituzue: www.mod-pc.com